Fainas

Sardinia Sustainabiity

Sardinia Sustainability est una faina chi bolit ponni impari totu is chi traballant a s’ adelantamentu sustenìbili in Sardìnnia imperendi sa scièntzia de is informus. Bolit essi un’ arretza de espertus e unu magasinu de progetus interessantis. Seu su chi custa faina dd’ at strantaxada e su coordinadori puru.

Giassu de sa faina

AMSLA

Algorithm-architecture matching for sparse linear algebra. AMSLA est una libreria de àlgebra lineari spainada po processoris many-core e multi-core chi otimisat sa strutura de informus a segunda de s’architetura de is processoris.

AMSLA spriculat sa lestresa e su cumportamentu numèricu de is algorìtimus de àlgebra lineari spainada asuba de processoris many-core e multi-core. Candu custus algorìtimus traballant aìnturu de processoris de i-custa calidadi, is informus funt buscaus de manera no arregulari. Po custu, sa lestresa de s’ aplicatzioni dependit totu de sa strutura de su problema.

AMSLA sceberat sa mellus strutura de informus chi assoghit sa matrici spainada de su problema, arrelatendi-dda a s’ architetura de su processori, e otennit lestresa bona.

Giassu de sa faina

Problemas de otimisadura po fàbricus abistus

Un’ arregorta de problemas matemàticus de otimisadura chi pertocant fàbricus abistus (smart buildings).

Custus funt problemas de otimisadura amesturaus interus-linearis (MILP), anca si bolit minimisai su costu de portai potèntzia lètrica a una domu sceti o a unus cantu apartamentus. In sa primu chistioni, sa domu tenit unu pranu foto-voltàicu e una bateria. In sa segundu chistioni, s’ imperu de su pranu foto-voltàicu est partziu intra is apartamentus e dònnia apartamentu tenit sa bateria cosa sua.

Is paràmetrus de is problemas podint essi cambiaius po spriculai sa complessidadi e su tempu de arresolvidura.

Giassu de sa faina

Amostai informus: studiendi sa strutura apalas de sa matemàtica

Una faina de amostai informus de matricis spainadas.

Is ainas po amostai informus si podint agiudai a cumprendi mellus sa strutura de is matricis spainadas, po su chi pertocat s’ assogadura a grafu. Imperendi custas ainas, apu amostau e studiau sa strutura de matricis bogadas arresolvendi unus cantu problemas de otimisadura.

Tengu is deretus de còpia de totus is màginis in i-custa galleria. Totu is deretus funt arriservaus.

Giassu de sa faina